|
 Пишува: мр. Лидија Зорба, психолог
Центар за применета психологија „Зорба Консалтинг„ - Скопје
ТЦ Лептокарија, ул. Н. Русински 3б.
е-маил:
Оваа е-пошта е заштитена од spambots, треба да вклучите JavaScript за да ја видите
тел: 02 3062653, 075 216617
Држење нискокалорични, високопротеински диети
Во почетокот на држењето на нискокалорични високопротеински диети, многу поважни се практичната и психолошката подготовка за промена на режимот на исхрана, отколку педантното пресметување на калориите за секој оброк. Тоа е затоа што овој вид диети драстично отстапуваат од вообичаената македонска кујна, како по изборот на намирниците, така и по начинот на приготвување на оброците. Потоа, овој вид диети се врзани за три главни оброци и најмалку два меѓуоброка, кои треба да се изедат во одредени временски интервали.
Практичната и психолошката подготовка за држење диета за топење на поткожните масни наслаги е база на успехот. Таа се состои во тоа што: ќе направите колку што е можно пореална проценка за тоа какви се вашите услови и можности (здравствена состојба, работа, деца, време за приготвување на храната, време за вежбање, време за одмор и пари за набавка на потебните прехранбени продукти) за нејзино доследно спроведување.
Ова го потенцирам, затоа што многупати доволно е да нема само еден од споменативе услови, па диетата да се прекине уште на почетокот или на "полпат". Ваквите прекини доведуваат до разочарување, чувство на вина или жалење по "залудните" напори и одрекувања кои не вродиле со плод.
Ако ова не ве обесхрабри, пред да прејдам на намирниците со кои ќе се храните за време на диетата, ќе потсетам дека за држење на оваа диета потребно е да сте здрави, да имате работа која нема често да ве оневозможува соодветно да се храните, на членовите на семејството јасно да им дадете до знаење дека вашите оброци ќе ги приготвувате посебно од нивните и дека најмалку двапати неделно ќе спортувате, дека ќе си легнувате најдоцна во 23 часот и дека вашиот нов животен стил ќе чини пари.
По прекинот на диетата прво правило е - не се прејадувате! Освен тоа, продолжете да вежбате. Не мора да вежбате со ист интензитет, (на пример, ако сте вежбале петпати неделно, вежбајте трипати), но вежбајте. Во спротивно, вашиот шестнеделен труд, ќе го снема за две-три недели.
Замор и одмор
Ако сте решиле да држите диета која ќе ја комбинирате со редовна физичка активност (вежбање најмалку двапати неделно по еден час) треба да знаете дека за успешен старт кон целта и превенција од откажување од неа, од клучно значење е - спиењето.
Одењето на работа, домашните работи, спортувањето, па дури и седењето со гости пред телевизорот, се активности за кои е потребна психофизичка енергија. Правејќи ги сите овие нешта човекот се заморува и за да остане здрав, неопходен му е одмор. Колку е поголем заморот, толку треба да биде поголем и одморот. Најдобар одмор од дневните активности е спиењето и тоа - ноќното спиење. За време на спиењето во организмот се одвиваат важни физиолошки процеси кои им овозможуваат на мускулите да раснат, а на поткожните масни наслаги да согоруваат.
Колку и да се одморате преку денот, ако легнувате по 24 часот и не спиете барем седум часа, вие ќе се чувствувате изморени и без енергија.
Колку поинтензивни ќе бидат последниве две чувства, толку поголем ќе биде вашиот апетит. Нормално, толку ќе бидете подебели, поизморени и понезадоволни од себе си.
Бројните истражувања покажале дека луѓето кои помалку спијат, побрзо се дебелеат. Засега нема сигурни показатели зошто е тоа така, но - така е. Затоа, ако сакате да си го олесните и забрзате патот до витата става - легнете си на време и спијте најмалку осум часа. Тоа е единствениот и најдобриот начин постојано да бидете одморни, свежи и расположени за работа и тренинг.
Дневното спиење не може да го надомести ноќното спиење. Дневното спиење е добро, но само понекогаш и не подолго од еден час. Преку ден одмарајте се. Ноќе - спијте.
Внимавајте!!!!!
Многу луѓе во светот и кај нас со години водат војна со несоницата. Ако често ви се случува да не можете да заспиете навечер, обидете се со некоја од бројните "финти" кои, верувале или не - делуваат. Прво, не спијте преку ден. Ако сте многу изморени после работа, истуширајте се и лежите некое време, но не заспивајте.
Навечер, пред спиење можете да читате здодевна книга во кревет (често отворам учебник по статистика или стари весници пред спиење), да "броите овци", да се напиете нешто безалкохолно, да се истуширате со топла вода, да ја испрскате спалната со мирис на лаванда или некој друг пријатен мирис, или... Да, можете да земете и таблета за спиење. Но, правете го тоа само во ретки случаи (не повеќе од еднаш или двапати во месецот). Ако често земате таблети за спиење, по некое време ќе ви бидат потребни поголеми дози од нив, а по некое време нема да можете да заспиете без нив.
Препарати за слабеење
Ако сте им објавиле војна на поткожните масни наслаги и целу ?тот, добро е липолизата (разлагање на мастите) да ја поттикнете и со некои од многубројните препарати за таа намена. Моето искуство покажа дека Л-карнитинот дава одлични ефекти при нискокалорични диети и интензивно вежбање.
Карнитинот го откриле во далечната 1905-та година. Денес широко се употребува како диететски производ. Во последниве години тој е особено популарен додаток на специјалната исхрана како на професионалците, така и на спортистите аматери. Докажано е дека карнитинот е безопасен "фат бурнер" или согорувач на мастите. Со негова помош, мастите во телото "горат" и се претвораат во енергија за мускулите. Затоа, луѓето го употребуваат кога сакаат да ги намалат масните наслаги во организмот и да ја намалат телесната тежина. Природните прехранбени продукти во коишто има карнитин се: црвеното месо (особено јагнешкото), млечните производи, рибата, пилешкото месо, пченицата и ферментираните производи од соја и други. Овошјето и зеленчуците не содржат карнитин.
Л-Карнитинот е препорачлив за спортисти и за луѓе кои имаат зголемена физичка активност, како и за оние кои сакаат да ја намалат телесната тежина. Дефицитот на карнитин се карактеризира со чувство на измореност, болки во градите и мускулите и општа слабост.
Максималните ефекти од употребата на Л-карнитинот се постигнуваат со редовен тренинг, особено со аеробни активности (трчање, возење велосипед, аеробик и сл.) во комбинација со исхрана во која мастите се сведени на минимум.
Внимавајте!!!
Доколку решите да употребувате Л-Карнитин за намалување на телесната тежина, а не тренирате редовно и јадете исто или повеќе од вообичаеното - не очекувајте резултати. Ако не тренирате, разградувањето на мастите ќе биде незначително. Ако тренирате интензивно, но јадете многу повеќе од вообичаеното, т.е. внесувате повеќе јагленохидрати, протеини и масти, тогаш нивната потрошувачка ќе се компензира со внесот и пак нема да има резултати.
Користете го Л-Карнитинот во периоди кога имате време да тренирате редовно и интензивно. Тие периоди не треба да бидат покуси од шест недели. Задолжително водете сметка за дневниот калориски внес, но и за внесот на минерали и витамини. Во спротивно, парите дадени за препаратот се фрлени пари. Или ако повеќе ви се допаѓа, тоа се пари потрошени за однапред неуспешен експеримент.
|
.jpg)
Здраво живеење 